होममेड' म्हणता येईल अशी घरातूनच बनविलेली मालिका ‘आठशे खिडक्या नऊशे दारं' !!

नवे चित्रपट तयार आहेत. पण थिएटर्स बंद आहेत. टिव्हीवरच्या मालिका आहेत तिथेच थिजून गेल्या आहेत. स्पॉटदादा ते हिरो, सगळेच आपापल्या घरी बसले आहेत. वेळ मारून नेण्यासाठी जुन्या मालिका पुन्हा टिव्हीच्या पडद्यावर दाखवल्या जात आहेत. पण काही जुन्या मालिकांचा तडका कधीच विरून गेल्यामुळे ती मजा पण येत नाहीये. अशा चक्रव्यूहात मनोरंजनाचे जग स्तब्ध उभे आहे. नुकसानीचे आकडे तर आता कोणी सांगत नाही आणि ऐकणारे पण ऐकत नाहीत. अशावेळी काही कलाकार मात्र यातूनही मार्ग कसा काढता येईल यावर विचार करीत होते. त्यातूनच अगदी शब्दशः 'होममेड' म्हणता येईल अशी घरातूनच बनविलेली ‘लॉकडाऊन’ विषयावरील मालिका ‘आठशे खिडक्या नऊशे दारं’ सोनी मराठी वाहिनी घरात बसलेल्या तमाम रसिकजनांसाठी घेऊन येत आहे. या मालिकेत एकूण १६ कलाकार आहेत आणि ते आपापल्या घरूनच या मालिकेचं चित्रीकरण करणार आहेत.