शाळकरी मुलांच्या मनातला कोरोना कसा असेल? पाहा या मुलांच्या चित्रांमध्ये तुम्हांला काय जाणवतंय...

या सायनच्या डी. एस. हायस्कूलमध्ये गेल्या चार वर्षांपासून ‘चित्रपतंग’ नावाचा कलासमूह  कला साक्षरता वर्ग भरवतोय. यात विद्यार्थ्यांमध्ये कला साक्षरता आणि दृष्यभान म्हणजेच गोष्टींकडे कलात्मक दृष्टीने कसं पाहायचं या दोन्ही गोष्टी  विकसित करण्यावर भर दिला जातो. 

हा उपक्रम का?

कोरोनाच्या बातम्या लहान मुलांच्या कानांवर सतत पडताहेत. कोरोनाविषयीची भिती पालकांच्या मनातून मुला-मुलींच्या मनात प्रवेश करतेय, नकळत ती मुलंही याचा विचार करत आहेत. त्यामुळे ह्या विद्यार्थ्यांच्या मनातला कोरोना कसा आहे, हे जाणून घेण्याची शाळेला आणि चित्रपतंगला उत्सुकता होती.  शिवाय विद्यार्थ्यांच्या चित्रकलेच्या सरावात कोणताही खंड पडू नये अशीही इच्छा होतीच. म्हणूनच त्यांनी विद्यार्थ्यांना हा विषय दिला. विद्यार्थ्यांनीही त्यांची चित्रं व्हाॅट्सअपद्वारे पाठवून या उपक्रमाला चांगला प्रतिसाद दिला.

चित्रं काढणं ही एक आर्टथेरपी!

कोरोना जगभर पसरलेली महामारी आहे. लहान मुलांच्या संवेदनशील मनावर लहानसहान गोष्टींचे इतके परिणाम होत असतात, तर कोरोनाचेही नक्की पडसाद उमटत असणार आहेत. रोज येणारे जगभरातले व्हिडिओज, मृत्यूचे आकडे, त्यातही आसपासच्या भागात कोरोनाचा एखादा रूग्ण किंवा मृत्यू झाल्यास या सगळ्या गोष्टी बालमनावर परिणाम करत असतात. कधीकधी कोरोनासारख्या आपत्तीच्या आणि त्यानंतरच्या काळातही पालकांच्या किंवा स्वत:च्या मृत्यूचे भय किंवा तशा प्रकारच्या भितीचे पडसाद लहान मुलांच्या मनात अनेक वर्षं उमटत राहतात.  हे सगळं चित्राद्वारे किंवा कुठल्याही कला-लिखाणाद्वारे मनातून उतरले नाहीत तर अशा पडसादांचा त्यांच्या मानसिकतेवर दीर्घकालीन परिणाम घडू शकतो. चित्रं काढून स्वत:ला अभिव्यक्त करणं ही एकप्रकारे ‘आर्ट थेरपी’च आहे”, असं मत डी. एस. हायस्कूलमध्ये कला साक्षरतेचे वर्ग घेणा-या प्राची श्रीनिवासन ह्यांनी व्यक्त केलं.

लेखक : कीर्तीकुमार शिंदे