गॉडफादर सिनेमात मार्लन ब्रँडोने गालात नक्की काय आणि का ठेवले होते?

Image Source

गॉडफादरसाठी मार्लन ब्रॅंडो या अभिनेत्याने प्रचंड मेहनत घेतली होती. त्याने साकारलेला डॉन कार्लीओनी सिनेमात तोंडात एकतर काहीतरी ठेऊन वावरतो किंवा त्याचे तोंडच तसे असावे. त्याच्या तोंडात नेमके काय होते हा प्रश्न आजही अनेकांना पडला आहे. आता यामागील स्टोरी अशी आहे की, मार्लन ब्रॅंडो याला गॉडफादरचा लूक हा एखाद्या डॉनला शोभेल असा करायचा होता. त्यासाठी तो हिंसक आणि खुनशी दिसणे ही पहिली अट होती. आपण तसे दिसतो का याबद्दल ब्रॅंडोला काही गॅरंटी नव्हती. सुरुवातीला तर त्याने ऑडिशनवेळी चक्क तोंडात कापसाचा बोळा कोंबला होता. 

यामुळे त्याचे एका साईडचे गाल थोडे फुगीर दिसायचे आणि त्याला हवा तसा लुक त्यामुळे मिळत होता. पण पूर्ण गॉडफादरच्या शूटिंगसाठी असा कापसाचा बोळा कोंबून फिरणे काय योग्य ठरले नसते. म्हणून मग त्याने यावर एक नामी युक्ती केली. यासाठी त्याने एक डेंटिस्ट गाठला. डेंटिस्टकडून त्याने दातांखाली बरोबर दबलेला राहील असा एक माऊथपीस बनवून घेतला. यामुळे त्याची क्रूर दिसण्याची हौस पूर्ण होणार होती. पण हे सोपे नव्हते. शूट पूर्ण होईपर्यंत त्याला हा माऊथपीस तोंडात ठेवावा लागला. 

अनेकांना त्याने तंबाखू वगैरे तर तोंडात धरून ठेवली नाही ना अशी शंका होती. सिनेमाचे शूटींग संपल्यावर मार्लन ब्रँडोने वापरलेले  माऊथपीस अजूनही न्यूयॉर्क येथील अमेरिकन म्युझियममध्ये ठेवलेले आहे. यावरून एक गोष्ट स्पष्ट होते एखादी महान कलाकृती तयार होत असताना त्यामागे त्या कलाकारांची मेहनत देखील तितकीच महान असते.

उदय पाटील