f
computer

तुमच्या मोबाईल मध्ये लपून बसलेला 'एजेंट स्मिथ' आहे तरी कोण ? 'एजेंट स्मिथ' पासून आपला मोबाईल सुरक्षित कसा ठेवाल ??

व्हॉट्सॲप उघडत असताना तुमच्या मोबाईलवर पॉपअप मेसेज येत आहे? जर उत्तर हो असेल तर मंडळी तुमच्या मोबाईलवर 'एजेंट स्मिथ' नावाच्या एका मालवेअरने आक्रमण केले आहे. ज्यांना अजून तसे मेसेज आले नाहीत त्यांनी आनंदी व्हायचे कारण नाही राव!! कारण हा मालवेअरचा तडाखा लय जोरात बसत आहे. तो कधीही तुमच्या मोबाईलवर येऊन धडकू शकतो.

जगभरात तब्बल अडीच कोटी मोबाईल या वायरसने पीडित आहेत. त्यातले दीड कोटी फक्त भारतात आहेत. अमेरिकेत ३ लाख लोकांना या वायरसमुळे फटका बसला आहे. हा मालवेअर गेल्या काही दिवसातला सर्वात खतरनाक हल्ला मानला जात आहे. या मालवेअरला 'एजेंट स्मिथ' असे नाव देण्यात आले आहे.

चला तर या 'एजेंट स्मिथ'विषयी जाणून घेऊया.

इस्रायलची सेक्युरिटी एजेंसी - 'चेक पॉईंट'नुसार हे मालवेअर ऑटोमॅटिकली तुम्ही इन्स्टॉल केलेली ॲप्स अनइंस्टॉल करतो आणि त्या जागी मालवेअर असलेले ॲप्स इंस्टॉल करतं. पुढे चालून हे मालवेअर तुम्हाला फ्रॉड जाहिराती दाखवते. तसेच तुमची बँकिंगसंबंधी आणि खाजगी माहिती चोरते.

 

हे मालवेअर मोबाईलमध्ये घुसते कसे??

जेव्हा तुम्ही गुगल प्ले-स्टोअरऐवजी दुसऱ्या प्लॅटफॉर्म्सवरून ॲप्स डाउनलोड करता, तेव्हा हे मालवेअर तुमच्या मोबाईलमध्ये शिरण्याचा धोका सर्वात जास्त असतो. त्यानंतर गुगल अपडेटिंग टूलच्या माध्यमातून हे तुमच्या मोबाईलमध्ये घुसते. बऱ्याचदा हे मालवेअर गुगल अपडेटर सारख्या ॲपच्या नावाने इंस्टॉल होतं. गुगलचं नाव बघून आपण त्याकडे फारसं लक्ष देत नाही. हेच या मालवेअरच्या पथ्यावर पडतं. एका अर्थी हा मोबाईलमध्ये दडून बसणारा सिक्रेट एजंटच म्हणायचा. काही काळाने हे मालवेअर व्हॉट्सॲपसारख्या ॲपवर कंट्रोल मिळवते. आणि मग फ्रॉड जाहिराती दिसायला सुरुवात होते.

या गुगल प्ले-स्टोअर व्यतिरिक्त इतर ठिकाणी असलेल्या ॲप्समध्ये प्रामुख्याने 9Apps सारख्या ऍप्सचा समावेश होतो. त्यांचे मुख्य टार्गेट हे आशियाई देश आणि रशिया आहे. त्यात भारत हा सध्या मोठी बाजरपेठ असल्याने पहिला निशाणा भारत हाच आहे. भारताबरोबरच पाकिस्तान-बांगलादेश पण त्यांच्या टार्गेटवर आहेत.

'एजेंट स्मिथ’मुळे कसे नुकसान होते ?

'एजेंट स्मिथ’ मालवेअर दडून बसलेले असल्याने व्हॉट्सअपच्या माध्यमातून ते जाहिराती दाखवतात. या जाहिरातींच्या माध्यमातून तुमच्या मोबाईलमधील बँकिंग ऍप्सचा वापर करून हॅकर्सला पैसा पाठवला जातो.

याचा सरळ सोपा अर्थ असा आहे मंडळी की व्हॉट्सअपच्या माध्यमातून दिसणाऱ्या ॲडवर केली जाणारी एक क्लिक तुमचे मोठे नुकसान करू शकते. म्हणून व्हॉट्सअप ऍड दिसली तर त्वरित एखाद्या सॉफ्टवेअर एक्सपर्टला मोबाईल दाखवून होणारे नुकसान टाळावे...

सबस्क्राईब करा

* indicates required