'चड्डी'ला मिळालं ऑक्सफर्ड डिक्शनरीत स्थान....पण हा शब्द का निवडला असेल भाऊ ??

Image Source

जंगल जंगल बात चली है पता चला है,
अरे चड्डीज पहन के फुल खिला है, फुल खिला है...

राव, या गाण्यात चड्डी हा शब्द ऐकून त्याकाळी अनेकांच्या भुवया उंचावल्या होत्या, पण आज २०१९ साली हाच शब्द चक्क ऑक्सफर्ड डिक्शनरीत जाऊन बसलाय. ऑक्सफर्डने या शब्दाला निवडण्यामागे काय कारण आहे ते जाणून घेऊया.

Image Source

‘चड्डीज’चा अर्थ ऑक्सफर्ड डिक्शनरीत “शॉर्ट ट्राउजर, शॉर्ट्स” असा देण्यात आला आहे. या शब्दाचा पहिला वापर Blackwood Edinburgh मासिकात करण्यात आला होता. त्यानंतर नव्वदीत आलेल्या “Goodness Gracious Me“ या काहीशा भारतीय आणि ब्रिटीश धरतीच्या इंग्रजी टीव्ही मालिकेत हा शब्द पहिल्यांदा उच्चारण्यात आला. या मालिकेत एक वाक्य होतं - “'Kiss My Chuddies”. हे वाक्य आणि त्यापाठोपाठ चड्डी जगभर फेमस झाली होती भाऊ. त्यानंतर तो सर्रास वापरला जाऊ लागला. याच कारणाने तो ऑक्सफर्ड डिक्शनरीत सामील करण्यात आला आहे.

Image Source

(Goodness Gracious Me)

ऑक्सफर्ड डिक्शनरी तर्फे 'Words Where You Are' ही मोहीम चालवण्यात आली होती. ऑक्सफर्डने लोकांना नवीन शब्द सुचवायला सांगितले होते. या मोहिमेला लोकांकडून मोठ्या प्रमाणात प्रतिसाद मिळाला. लोकांनी सुचवलेल्या शब्दातून काही मोजक्या नवीन शब्दांना ऑक्सफर्ड डिक्शनरीत स्थान मिळालं आहे. अशा प्रकारे मार्चच्या नव्या आवृत्तीत ६५० नवीन शब्द सामील करण्यात आले आहेत. अर्थात यात भारतीय “चड्डीज” पण असणार आहे.

तर मंडळी, ‘चड्डी’ला मिळालेल्या या बहुमानाबद्दल तुम्हाला काय वाटतं ? प्रतिक्रिया आल्याच पाहिजेत भाऊ !!