४००किमी उंच आकाशातून ज्वालामुखी कसा दिसतो पाहायचाय? पाहाच मग इथे!!

उदय पाटील

October 16, 2021

ज्वालामुखी हा सर्वांसाठी मोठा कुतूहलाचा विषय आहे. ज्वालामुखीचा स्फोट, त्याचे तयार होणे, ज्वालामुखी पासून निघणारा लाव्हारस या सर्व गोष्टी माणसाला चकित करत असतात. आज आम्ही याच साखळीतील थोडी वेगळी गोष्ट सांगणार आहोत. हाच ज्वालामुखी आकाशातून कसा दिसत असेल?

आयएसएसमधल्या काही अंतराळवीरांनी जपानच्या कुरील आयलँड येथे असलेल्या सारीचेव ज्वालामुखीचे आकाशातून फोटो काढले आहेत. या फोटोंची मालिका जवळपास ११ वर्षं आधी २००९ साली काढली गेली होती. हा ज्वालामुखी शिखर कुरील आयलँड साखळीतील सर्वात जास्त जागृत समजला जातो.

Image Source

नासाच्या म्हणण्यानुसार या ज्वालामुखीचा हा विस्तृत फोटो ज्वालामुखीतज्ञांना मोठी मदत करणारा ठरू शकतो. या फोटोत स्फोट होण्याच्या बरोबर सुरुवातीचा काळ कैद झालेला दिसेल. या फोटोत तपकिरी राख आणि पांढरी वाफ दिसते.

नासाने केलेल्या दाव्यानुसार वरच्या बाजूला दिसणारा गुळगुळीत पांढरा भाग हा पाण्याच्या संक्षेपणामुळे(कंडेनसेशन) असू शकतो. त्यामुळे राखेच्या वरील हवेतील भाग हा वेगाने थंड होतो. याला पिलीयस क्लाउड म्हटले गेले आहे. याचबरोबर तुम्ही करड्या रंगाचे राखेचे ढग पाहू शकता. हा ढग ज्वालामुखीच्या ग्राऊंड ते कळस असा चढत्या क्रमात दिसेल.